Magnum компаниясы Солтүстік Қазақстандағы «Семейный» сауда желісін сатып алды

Қазақстандағы ірі бөлшек сауда желісі — Magnum - «Семейный» сауда желісінің сауда жабдықтарын, оның барлық сауда орнына құқығын, тарату орталығы мен «асхана фабрикасын» сатып алды. Петропавл мен Солтүстік Қазақстан облысындағы «Семейный» сауда желісінің 17 дүкені 2022 жылдың қаңтарына дейін осы брендпен жұмыс істейді деп жоспарлануда. Аталған күннен кейін бөлшек сауда желісінің дүкендері Magnum брендінің астында жұмыс істей бастайды. «Семейный» сауда желісінің басшысы Андрей Исаков Magnum-ның стратегиялық серіктесі болып қала береді — оған тиесілі сауда орталықтарының ұзақ мерзімді жалға берілуі туралы келісімге қол қою бойынша жұмыстар жүргізілуде.

Андрей Исаков «Семейный» сауда желісінің басшысы: «Бұл келіссөз ұзақ уақыт созылды: Magnum Солтүстік Қазақстан нарығында өзінің нүктесін кеңейту мүмкіндігін іздеді, аймақтық бөлшек сауда желілерін сатып алу - бұл әлемдегі ірі бөлшек желілерді дамытудың жалпы қабылданған стратегиясы. Бізді олардың ұсынысы қызықтырды, өйткені олар әділ баға береді және қаншама жылдар бойы менің отбасыма айналған ұжымды сақтауға қызығушылық танытты. Нәтижесінде қос тарап үшін де тиімді келісімшартқа отырдық. Сатып алушылар болса, бұдан жеңілмейді: Магнум Қазақстандағы ірі бөлшек сауда желісі ретінде көтерме келісім-шарттар бойынша үлкен мүмкіндіктерге ие, олар сатылатын көлем мен қазіргі заманғы технологиялардың арқасында көптеген тауарлардың бағасын төмендете алады. «Семейный» сауда желісінің барлық ұжымына «Magnum» үлкен отбасының қатарында тек сәттілік тілеймін!»

«Семейный» сауда желісінің ұжымы - 1565 қызметкерден тұрады, олардың көпшілігі Magnum компаниясында жұмысын жалғастыруға ниет білдірді. Сонымен қатар, қазіргі уақытта 12 мыңнан астам адамды жұмыспен қамтыған Magnum, Петропавлда тағы 4 дүкен ашуға дайындалып жатқандықтан, Солтүстік Қазақстан облысындағы қызметкерлер санын одан әрі арттыруды жоспарлап отыр. Magnum Солтүстік Қазақстан облысында жалға алатын «Семейный»сауда орталықтарының жалпы ауданы (әлі ашылуға дайындалып жатқандарды қоса алғанда) - 30 455 шаршы метр, сауда алаңы - 17 146 шаршы метрді құрайды.

Азамат Османов, Magnum компаниясының басқарма төрағасы: «Біздің даму стратегиямыз Қазақстанның барлық аймақтарында желіні одан әрі кеңейтуді жоспарлайды — және біз Солтүстік Қазақстан облысында жергілікті нарықтағы жетекші ойыншылардың бірімен келісімге қол жеткізгенімізге қуаныштымыз. Оның үстіне, «Семейный» желісінің негізін қалаушы Андрей Исаковты аймақта сенімді серіктес екені мәлім, сондықтан біз онымен ынтымақтастығымызды жалғастырамыз — атап айтқанда, өз бизнесіміз үшін оған тиесілі ғимаратты жалға аламыз. Біз Андрей Исаков пен «Семейный» сауда желісінің барлық ұжымының қосқан үлесін құрметтейміз және бағалаймыз, осы уақытқа дейін жасалғанның бәрін сақтаймыз. Ол ғана емес! Біз желіні одан да жақсартатын боламыз. 3 миллион сатып алушы Magnum-да тұрақты сауда жасайды. Бұл елдегі ең ірі және заманауи бөлшек сауда желісі. Бұл дегеніміз, біз тұтынушыларға тауарлардың ең кең таңдауы мен ең жақсы бағаны ұсына аламыз және сатып алу процесін барынша ыңғайлы етеміз. Біз барлық солтүстік қазақстандықтарды біздің желінің жаңа дүкендерінде күтеміз!»

Қазақстандағы ең ірі бөлшек сауда желісі Magnum 2021 жылдың қазан айындағы көрсеткіші бойынша, Қазақстанның 12 қаласында 146 түрлі форматтағы дүкендермен ұсынылған («Magnum» және «Реалист» брендтері). Magnum барлық сауда орталықтарының жалпы ауданы 330 000 шаршы метрден асады, сауда алаңы — 213 000 шаршы метрден асады. Magnum бөлшек сауда желісінің тауар жинағы 40 мыңнан астам өнімді құрайды, жеткізушілердің жалпы саны — 1100-ден асады, оның 700-ден астамы — Қазақстан жеткізушілері. Барлық сатылатын өнімнің шамамен 50% — отандық өнім. Компания 2007 жылдан бері жұмыс істейді. Magnum - Қазақстандағы ең ірі он жеке компанияның бірі болып табылады. Magnum дүкендеріне күн сайын 300 мыңға жуық адам келеді.

3 миллионға жуық адам бөлшек сауда желісінің тұрақты тұтынушылары, ал 1 миллион адам Magnum Club адалдық бағдарламасының қатысушысы болып табылады.